(ابن الحتة )لقب يلقى على الشاب الريفى البسيط..
وكذا (بنت الحتة)يُلقى على الفتاة الريفية البسيطة
..والأمنيات الآتية كانت نتاج حوار أجرته الزميلة عروبه النلتقاويه
مع عروبه (بنت الحتة)...


لما ابن الحِتّه بيتمنى ,
أو بنت الحته بتتمنى
بنقول الأول بسم الله

وبَحِبْ الناس..
وبحب ملوك كان ليها بيبان من غير حُرّاس
وبحِب حاجات من غير حسابات و(حبشتكانات)
شوّهوا مظهرها ,إنما جوهرها زى الماس..

وهَهِدّ حروف محفوفه بخوف الناس بنياه..
وهَحُطّ مكانها كلام الناس بتتمناه...
,وماحِبّش آخد دايما كل اللى انا عايزاه..

وماليش ف الـ(واسطه)..
وماحِبش يبئى بينى وبين الناس كام بوسطه..
واحب كمان أكتب ف كلام من غير ولا نُقطه..

وبحب كلام يوصل على طول من غير تأويل..
,,من ير دُوُل قالوا ودُولَةْ عادوا وشرح طويل..!

وماحِبّش ان الناس تنادى لـ( بِلْيّه) يا ( واد)!!
وماحبش اللى يعيد كده دايما ف الـ( مِتْعاد)..

واهوى التطنيش..
الناس ماعَدِتش عايزه خلاص تشبيه ولا فيش..
الناس ( طافحاه)..!
وبيشمّوا نَفَسْهم بالعافيه عينى يا وِلْداه...

وماحبّش اللى ييجى ف هايفه ويِصّدّر..!!
ف جدال ف الباطل تلقى الـ(سِحْنَه)ف كل مكان..,
لكن ف الحق تلقاه يطَنّش ويكَبّر..!!

وماحبش ناس تعمل للشعب (أبو العرَيف..)!!
وتجيب كام ضيف..,
تهوى التطبيل ويّا التسقيف,,
خبراء تزييف..!
وتخللى ف لحظه ابو دم تقيل بأه دمه خفيف..!
وتدّخّل (كوسه)ف(ملوخيه)ف(حتة بلوبيف)!!

وماحبّش اللى كلامهم دايما متزخرف..!
وماحبش برضه اللى (يهيّس)ويخَطْرَف...

واحب الناس اللى بتدخلّك كده (دوغرى)
واحب اللى ينام ويصحى كده من بدرى..

بحب الناس الى بيقولوا عليهم (اخوان)
وماحبش اشوف أبدا مرة واحد متهان..
وماحبش اعيش من غير مافهم ايه المقصود..
وماحبش احُط لطموحاتى (أيتُها ) حدود..,
وبحب افتّح لعنيه شبابيك وبيبان..

وماحبش شوف على بضاعتنا(صُنعت ف الصين)!
وماحبّش شُغل المعونات ده وشُغل الـ(تقطيم)

وماحبش اللى يقول حاجه من غير تفسير..,
واهوى التغيير..
واحب الواد ابن الـ(حِتّه) على جارته يغير..

وماحبش اشوف بين بلادنا مسافات وحدود..!
ومعابر كده مالهاش لازمه على شُغل يهود..!
وان قلنا اشمعنا..؟
تيجى امريكا..
تِعْمِلّك فيها انها قاضى..,,
وتقولّك أى كلام فاضى...,
ترميلنا معونه ونتعامل على إنا قرود..!!
احنا صحينا..,
وان كنا ف يوم خوفنا شويه أصبحنا أسود...

وماحبش اللى يِعْمِلّك فيها فتوّه..!
ويحب يمشذى كلامه دايما بالقوّه..!

وماحبش اللى يدخّل نفسه ف اللى مالوش...,
وماحبش شُغل (الأفلامانات ) على (حلّق حوش)..
وماحبش (اكره )ولا (أحب) اللى معرفهوش...

وماحبش اشوف بنتين ماشيين لابسين (باديهات)..!
وماحبش شُغل الرجاله تِعْمله ستات..!

وماحبش ألاقى شباب تايه مش لاقى فُتات..
عايزين كده (ننِجز) و(نقصّر) كل الـ(حوارات)..
عايزين رجّاله تبدأ تِبنى ف بلدنا بجد..
لاتقول مره خلاص تعبنا ولا (حيلنا اتهد)
عايزين كده دايما حواراتنا تتبنى ع الوِدّ

ولحد ماشوف اللى انا حابّاه..
هَفْضَل أتكلم واتكلم..
يلا استحملوا..
أمركوا لله..